ನಮ್ಮ ಬಗ್ಗೆ

ಸಮಾಜ ವಿಜ್ಞಾನ ಡಿಜಿಟಲ್ ವೇದಿಕೆ, ಬಾಗಲಕೋಟ

“ಉನ್ನತ ಆಲೋಚನೆಗಳು ಎಲ್ಲೆಡೆಯಿಂದ ಹರಿದು ಬರಲಿ”, ಎಂಬ ‌ಮಾತಿನಂತೆ “ಸಮಾಜ ವಿಜ್ಞಾನ ‌‌ಡಿಜಿಟಲ್ ವೇದಿಕೆ, ಬಾಗಲಕೋಟ”, ಹತ್ತು ಹಲವು ವಿಚಾರಗಳನ್ನ ಹೊತ್ತ ಶಿಕ್ಷಕ ಬಳಗದ ಒಂದು ಫಲ ಎಂದರೆ ತಪ್ಪಾಗಲಾರದು. ಕರೋನ ಎಂಬ ಹೆಮ್ಮಾರಿ ಜಗತ್ತನ್ನು ಅಲ್ಲೋಲ ಕಲ್ಲೋಲ ಮಾಡಿದ ಈ ಕಾಲದಲ್ಲಿ ಶಾಲಾ ಕಾಲೇಜುಗಳು ರಜೆ ನೀಡಿರುವಾಗ ಕ್ರಿಯಾಶೀಲ ಶಿಕ್ಷಕರು ಸುಮ್ಮನಿರಲು ಸಾಧ್ಯವಿಲ್ಲ. ಎಂಬುದನ್ನ ನಮ್ಮ ತಂಡ ತೋರಿಸಿಕೊಟ್ಟಿದೆ.

ಕರೋನದಿಂದಾದ ಅನಾನುಕೂಲ ಪರಿಸ್ಥಿತಿಯನ್ನೇ ಅನುಕೂಲಕರವಾಗಿ ಬದಲಾಯಿಸಿಕೊಂಡು ಹೊಸ ಮನ್ವಂತರದೆಡೆ ಅಡಿ ಇಟ್ಟ ನಮ್ಮ ತಂಡದ ಹೆಜ್ಜೆ ಅಚಲವಾಗಿದ್ದು ಮಾತ್ರ ಸತ್ಯ. ಕರೋನದ ಕಾರಣ ಶಾಲೆಗಳು ರಜೆ ಇರುವಾಗ ಕೆಲವು ಶಿಕ್ಷಕರಲ್ಲಿ ಶುರುವಾದ ಚರ್ಚೆ- “ಹಾಗಾದರೆ ಈ ರಜೆಯ ಅವಧಿಯನ್ನೇಕೆ ನಾವು ಯೋಗ್ಯ ರೀತಿಯಲ್ಲಿ ಬಳಸಿಕೊಳ್ಳಬಾರದು ಎಂಬುದಾಗಿತ್ತು. ಪರಿಣಾಮ ಬಾಗಲಕೋಟ ಜಿಲ್ಲೆಯ ಮೂಲಕ ಸಮಾಜ ವಿಜ್ಞಾನ  ವಿಷಯಕ್ಕಾಗಿ  ಅತ್ಯುತ್ತಮವಾದ  ಸಂಪನ್ಮೂಲ  ತಯಾರಿಕೆಗಾಗಿ  ಯೋಜನೆಯೊಂದು ಸಿದ್ಧವಾದದ್ದು ಶ್ರೀ‌ ಬಿ ಡಿ ಪಾಟೀಲ ಹಾಗೂ ಶ್ರೀ ಎಲ್ ಡಿ ಮಮದಾಪೂರ ಇವರ ತಲೆಯಲ್ಲಿ, ತಕ್ಷಣ ಕಾರ್ಯ ಪ್ರವೃತ್ತರಾದ ಇವರು ಬಾಗಲಕೋಟ ಜಿಲ್ಲೆಯ ಸಮಾಜ ವಿಜ್ಞಾನ ವಿಷಯ ಶಿಕ್ಷಕರ ವಾಟ್ಸಪ್ ಗುಂಪುಗಳಲ್ಲಿ “ಡಿಜಿಟಲ್ ಸಂಪನ್ಮೂಲ ತಯಾರಿಕೆಗಾಗಿ ಶಿಕ್ಷಕರು ಕೈ ಜೋಡಿಸುವಿರಾ” ಎಂಬ ಸಂದೇಶ ಹಾಕಿದ್ದೇ ತಡ, ಶ್ರೀ ಮಂಜುನಾಥ ಹಾವರಗಿ, ಶ್ರೀ ಐ ಜಿ ಕಡಿಬಾಗಿಲ, ಶ್ರೀ ಎಂ ಆರ್ ನದಾಫ, ಶ್ರೀ ಡಿ ಬಿ ನದಾಫ, ಶ್ರೀ ಬಿ ಆಯ್ ಹುಲ್ಲೂರ, ಶ್ರೀ ಸಿ ಎಸ್ ಹಳ್ಳೂರ, ಶ್ರೀ ಎಂ ಡಿ ಮಠಪತಿ, ಶ್ರೀ ಎಸ್ ಎಮ್ ದೊಡಮನಿ,  ಶ್ರೀ ಎಸ್ ಬಿ ಹೆಳವರ, ಶ್ರೀ ಎನ್ ಪಿ ಬಿರಾದಾರ, ಶ್ರೀ ಎಸ್ ಎಸ್ ಹಿರೇಮಠ, ಶ್ರೀ ಪಿ ಬಿ ಪಾಟೀಲ, ಶ್ರೀ ಪಿ ಬಿ ಯರಗಟ್ಟಿ ಗುರುಗಳು ಈ ಕಾರ್ಯಕ್ಕೆ ಕೈ ಜೋಡಿಸುವುದಾಗಿ ತಿಳಿಸಿದರು, ಪರಿಣಾಮವಾಗಿ “ಸಮಾಜ ವಿಜ್ಞಾನ ಡಿಜಿಟಲ್  ವೇದಿಕೆ ಬಾಗಲಕೋಟೆ” ಹುಟ್ಟಿಕೊಂಡಿತು. ಅದರಂತೆ ಏನು ಮಾಡಿದರೆ ಒಳಿತು ಎಂದು ಆಲೋಚಿಸಲಾಗಿ ಹತ್ತನೇ ತರಗತಿಯ ಎಲ್ಲ ೩೯ ಪಾಠಗಳ ಮೇಲೆ ರಸಪ್ರಶ್ನೆ ತಯಾರಿಸುವ ಬಗ್ಗೆ ನಿರ್ಧಾರ ಮಾಡಿ ಗುಂಪಿನ ‌ಎಲ್ಲ ಸದಸ್ಯರಿಗೂ ಪಾಠಗಳ ಹಂಚಿಕೆಯಾಯಿತು. ತಾಂತ್ರಿಕ ಕಾರ್ಯ ಶ್ರೀ ಬಿ ಡಿ ‌ಪಾಟೀಲರ ಜವಾಬ್ದಾರಿಯಾಯಿತು.

ಹೀಗೆ ಹತ್ತನೇ ತರಗತಿಯ ಎಲ್ಲ ಪಾಠಗಳ ರಸಪ್ರಶ್ನೆಗಳು ತಯಾರಾಗತೊಡಗಿದವು, ಇದರ ಜೊತೆ ಜೊತೆಗೆ ಎಸ್ ಎಸ್ ಎಲ್ ಸಿ ವಿದ್ಯಾರ್ಥಿಗಳಿಗೆ ಆನ್‍ಲೈನ್‍ ಮೂಲಕ ಪಾಠ ಬೋಧನೆ ಹಾಗೂ ಸಂದೇಹಗಳನ್ನು ಬಗೆಹರಿಸಿ ಅವರಲ್ಲಿ ಆತ್ಮ ಸ್ಥೈರ್ಯ ತುಂಬುವ ಕೆಲಸವೂ ಕೂಡಾ ನಡೆಯಿತು. ರಸಪ್ರಶ್ನೆಗಳೇನೋ ತಯಾರಾದವು ಆದರೆ ಅವುಗಳನ್ನು ಸಮಾಜ ವಿಜ್ಞಾನ ಶಿಕ್ಷಕ ಬಳಗದೊಂದಿಗೆ ಹಂಚಿಕೊಳ್ಳುವುದು ಹಾಗೂ ದೀರ್ಘಕಾಲ ಮುಕ್ತ ಬಳಕೆಗಾಗಿ ಎಲ್ಲ ಸಂಪನ್ಮೂಲಗಳನ್ನು ಕ್ರೋಢೀಕರಿಸಿ ಒಂದೆಡೆ ಸೇರಿಸುವ ಅಭಿಪ್ರಾಯ ಬಾಗಲಕೋಟ ಜಿಲ್ಲೆಯ ಸಂಪನ್ಮೂಲ ಶಿಕ್ಷಕರ ಅಭಿಪ್ರಾಯವಾಗಿ ಬದಲಾಯಿತು. ಈ ಹೊಸ ಆಲೋಚನೆಗಳ ಫಲಿತಾಂಶವೇ ಈ‌ ನಮ್ಮಬ್ಲಾಗ್!!!!!!!,

ಈ ಬ್ಲಾಗ್ ತಯಾರಿಸುವ ಹೊಣೆಗಾರಿಕೆ ಶ್ರೀ ಬಿ ಆಯ್ ಹುಲ್ಲೂರ, ಶ್ರೀ ಬಿ ಡಿ ಪಾಟೀಲರಿಗೆ ಹಾಗೂ ಭಾವಚಿತ್ರಗಳ ವಿನ್ಯಾಸ ಕಾರ್ಯ ಶ್ರೀ ಎಸ್ ಬಿ ಹೆಳವರ ಅವರಿಗೆ ನಿಡಲಾಯಿತು. ಬ್ಲಾಗ್ ತಯಾರಿಕೆಗೆ ಅವರೇನೋ ಸಿದ್ಧರಾದರು. ಆದರೆ ಆರಂಭಿಕವಾಗಿ ಹಲವಾರು ತೊಡಕುಗಳು, ಅಳುಕುಗಳು ನಮ್ಮನ್ನು ಕಾಡದೇ ಇರಲಿಲ್ಲ, ಸತತವಾಗಿ ಬೆಳಗಿನ ಜಾವದಿಂದ ರಾತ್ರಿ 10 ಗಂಟೆಯವರೆಗೆ ಸುಮಾರು ಎರಡು ವಾರಗಳ ನಿರಂತರ ಶ್ರಮವಹಸಿ, ಊಟ ಉಪಹಾರಗಳ ಯೋಚನೆಯೂ ಇಲ್ಲದೇ ಅತ್ಯದ್ಭುತವಾದ ಬ್ಲಾಗ್ ಸಿದ್ಧಗೊಳಿಸಿದ ಶ್ರೇಯಸ್ಸು ಇವರಿಗೆ ‌ಸಲ್ಲುತ್ತದೆ.

ಇನ್ನೂ ಹಲವಾರು ಸಂಪನ್ಮೂಲಗಳ ತಯಾರಿಕೆ, ಹಂಚಿಕೆ ಹಾಗೂ ಮುಕ್ತ ಬಳಕೆ ನಮ್ಮ ತಂಡದ ಗುರಿಯಾಗಿದೆ. ತಂಡಕ್ಕೆ ಹೊಸ ಸದಸ್ಯರಾಗಿ ಶ್ರೀ ಜಗದೀಶ ಬಾರಕೇರ, ಶ್ರೀ ಎಂ ಎಂ ಹದಲಿ, ಶ್ರೀ ಎಂ ಎಂ ಮುನವಳ್ಳಿ, ಶ್ರೀ ವಿವೇಕಾನಂದ ಭಜಂತ್ರಿ, ಶ್ರೀ ಕೆ ಎಚ್ ಹಂಚಿನಾಳ, ಶ್ರೀ ಎಸ್ ಎಸ್ ವಿಕ್ರಂ, ಶ್ರೀ ಎಸ್ ಎಸ್ ಸಾರಂಗಮಠ ರವರ ಸೇರ್ಪಡೆ ನಮ್ಮ‌ ಶಕ್ತಿಯನ್ನು ನೂರ್ಮಡಿಗೊಳಿಸಿದೆ. ಇವರು ನಮ್ಮ ತಂಡ ಸೇರಿದ ನಂತರ 8 ಹಾಗೂ 9ನೇ ತರಗತಿಯ‌ ರಸಪ್ರಶ್ನೆಗಳ ತಯಾರಿಕೆಗೆ ‌ನಾಂದಿ ಹಾಡಲಾಯಿತು.

ಬ್ಲಾಗ್ ರಚನೆಗೆ ಪ್ರೋತ್ಸಾಹಿಸಿ ಸಹಕಾರ ನೀಡಿದ ಶ್ರೀ ರವಿ ಆಹೇರಿ ಹಾಗೂ ಶ್ರೀ ವಸಂತ ಶ್ಯಾಗೋಟಿ ಗುರುಗಳಿಗೂ ಅನಂತ ವಂದನೆಗಳು. ನಮ್ಮ ಸಮಾಜ ವಿಜ್ಞಾನ ಬಳಗವನ್ನು ಸದಾ ಹೊಸ ತುಡಿತಕ್ಕೆ ಹಾತೊರೆಯುವಂತೆ ನಿರಂತರ ಸಹಕಾರ ಮತ್ತು ಮಾರ್ಗದರ್ಶನದೊಂದಿಗೆ ಪ್ರೋತ್ಸಾಹಿಸುತ್ತಿರುವ ನಮ್ಮ ಸಮಾಜ ವಿಜ್ಞಾನ ವಿಷಯ ಪರಿವೀಕ್ಷಕರಾದ ಶ್ರೀ ಡಿ ಎಂ ಯಾವಗಲ್ ಹಾಗೂ ಮಾನ್ಯ ಉಪನಿರ್ದೇಶಕರಾದ ಶ್ರೀ ಶ್ರೀಶೈಲ ಬಿರಾದಾರ ರವರಿಗೂ ನಮ್ಮ ವೇದಿಕೆಯ ವತಿಯಿಂದ ಹೃತ್ಪೂರ್ವಕ ಅಭಿನಂದನೆಗಳನ್ನು ತಿಳಿಸುತ್ತೇವೆ.

ಸಾಧನೆಯ ‌ಹಾದಿಯಲ್ಲಿ ಮನುಷ್ಯ ಅಲ್ಪತೃಪ್ತನಾಗಿರಬಾರದಂತೆ ಹಾಗಾಗಿ ‌ನಮ್ಮಿಂದ ಇನ್ನೂ ಏನನ್ನು ಕೊಡಲು ಸಾಧ್ಯವೋ ಆ ಎಲ್ಲ ಪ್ರಯತ್ನಗಳಿಗೂ ನಾವು ಸಿದ್ಧರಿದ್ದೇವೆ, ಸುಮಾರು ಇಪ್ಪತೈದು ಜನ ಸಂಪನ್ಮೂಲ ವ್ಯಕ್ತಿಗಳ ಬಾಗಲಕೋಟೆಯ ಈ ತಂಡ ಮುಂದಿನ ದಿನಗಳಲ್ಲಿ ಸಮಾಜ ವಿಜ್ಞಾನ ವಿಷಯವನ್ನು ಶ್ರೀಮಂತಗೊಳಿಸಲು ಅವಿರತ ಕಾರ್ಯನಿರ್ವಹಸಲು ಸಿದ್ಧವಾಗಿದೆ. ಇದಕ್ಕೆ ಬಾಗಲಕೋಟೆ ಜಿಲ್ಲೆಯ ಅಷ್ಟೇ ಅಲ್ಲದೇ ರಾಜ್ಯದ ಎಲ್ಲ ಸಮಾಜ ವಿಜ್ಞಾನ ವಿಷಯ ಶಿಕ್ಷಕ ಬಳಗವೂ ಸಹಕಾರ ನೀಡಲಿ ಹಾಗೂ ನಮ್ಮ‌ ಕಾರ್ಯಕ್ಕೆ ಬೆನ್ನೆಲುಬಾಗಿ ನಿಲ್ಲಲಿ ಎಂಬ ಆಶಯ ನಮ್ಮ ಬಾಗಲಕೋಟೆ ಸಮಾಜ ವಿಜ್ಞಾನ ಡಿಜಿಟಲ್ ವೇದಿಕೆಯ ‌ಅಪೇಕ್ಷೆ.

                          

                                       ಸಮಾಜ ವಿಜ್ಞಾನ ಡಿಜಿಟಲ್ ವೇದಿಕೆ, ಬಾಗಲಕೋಟ